Коррупция мамлакатлар ривожланишининг кушандаси ҳисобланиб, хозирги кунда унга қарши фақат Ўзбекистон Республикаси давлати эмас, балки бутун жахон давлатлари жиддий кураш олиб бормоқда.
Коррупция деганда нима тушунилади ўзи, коррупция атамасига қисқача тўхталиб ўтадиган бўлсак, мансабдор шахслар томонидан давлат ҳокимияти ёки бошқаруви ваколатларидан фойдаланган ҳолда шахсий манфаатларни ёки бошқа шахслар манфаатини кўзлаб содир этиладиган жиноятлар йиғиндиси бу коррупциядир. Демакки, бунда давлат ташкилотидаги мансабдор шахслар ўз мансабидан, ваколатидан фойдаланиб, бирор-бир манфаатни кўзлаб иш тутса унда коррупциянинг аломатлари мавжуд ҳисобланар экан, мазкур иллат тараққиёт ва мамлакатларнинг барқарор ривожланишига салбий таъсир кўрсатиб, хозирги кунда ҳаммани бирдек ташвишга солиб келмоқда.
Президентимиз Шавкат Мирзиёевнинг ташаббуси билан уни таг-томири билан йўқ қилиш мақсадида мамлакатимизда коррупцияга қарши курашишда кўплаб ишлар амалга оширилиб келинмоқда, Ўзбекистон Республикасининг 2017 йил 3 январдаги “Коррупцияга қарши курашиш тўғрисида”ги ЎРҚ-419-сонли Қонуни қабул қилинганлиги, унда коррупцияга қарши курашувчи органлар белгиланганлиги, 2019 йилда коррупцияга қарши курашувчи махсус агентлик ҳам ташкил этилганлиги бунинг яққол мисоли бўла олади.
Шунингдек, Ўзбекистон Республикаси Президентининг 2020 йил 27 майдаги “Ўзбекистон Республикасида коррупцияга қарши курашиш тизимини янада такомиллаштириш чора-тадбирлари тўғрисида”ги Фармонида барча давлат ташкилотларини “коррупциясиз соҳалар”га айлантириш ғоят долзарб вазифа этиб белгиланди. Мазкур Фармон ҳам давлатимизнинг коррупцияга қарши курашга жиддий бел боғлаганидан далолат беришини кўрсатиб қўйди.
Давлатимиз томонидан коррупцияга қарши қанча кураш олиб бормасин, барибир унинг домига тушиб, жиноятга қўл ураётган фуқаролар афсуски хозирги кунда йўқ эмас. Шунинг учун мазкур иллатни олдини олишда, коррупциясиз мухитни яратиш керак бўлади,бундабарча инсонлар бирдай ҳаракат қилган ҳолда унга қарши курашиши, бундай балонинг домига тушиб қолмаслик ва унга аралашиб қолмаслик учун жуда эхтиёткор бўлишлари, келажак авлодни ҳам шу рухда тарбиялаш жуда муҳимдир.

Худоберди ХОЛИҚОВ,
Жиноят ишлари бўйича Ёзёвон туман судининг
тергов судьяси.