ЭНДИ ХАЛҚАРО МАКТАБ ҲАМ БОР

Аваллари йилда бир ё иккита янги бинолар қурилиб, фойдаланишга топшириларди. Сўнгги 7-8 йил ичида уларнинг саноғига етмайсиз. Бу ҳам бўлса юртимизда олиб борилаётган кенг кўламли ислоҳотлар, аҳоли, тадбиркорларга берилаётган имтиёзлар самараси.

Баҳор маҳалла фуқаролар ҳудудида тадбиркор Алишер Қурбонов томонидан 5 млрд сўмдан зиёд маблағ эвазига 200 ўқувчига мослашган “Euro school” халқаро мактаби фойдаланишга топширилди.

Бинонинг очилиш маросимида туман ҳокими Дилшоджон Джалилов, ҳоким ўринбосарлари, ташкилот, корхоналарнинг раҳбарлари, нуронийлар, маҳалла вакиллари иштирок этишди.

Тадбирда сўзга чиққанлар юртимизда амалга оширилаётган ишлар, мустақиллик неъмати ҳақида гапириб ўтишди.

–Президентимиз бошчилигида мамлакатимизда ҳар соҳада ижобий ишлар амалга оширилмоқда, – деди туман ҳокими. – Бунинг ёрқин мисоли сифатида шу кунларда туманимизда очилаётган иншоотларни олишимиз мумкин. – Хусусий мактабдан юрт корига ярайдиган йигит-қизлар етишиб чиқади.

Тадбир давомида тадбиркор ва унинг отасига миннатдорчилик билдирилиб, ташаккурнома ва қимматбаҳо совғалар топширилди.

Кенг жамоатчилик иштирокида мактаб биносига тортилган рамзий тасма қирқилиб, яратилган шароитлар билан танишиб чиқилди. Яхши ниятлар, дуолар қилинди.