Joriy yilning 22-29 mart kunlari O‘zbekiston tumani hokimining investisiya masalalari bo‘yicha o‘rinbosari Jaxongir Akramov, tuman hokimining kapital qurilish va kommunikatsiyalar masalalari bo‘yicha o‘rinbosari Sherzodbek Ismoilov hamda tumandagi bir guruh tadbirkorlardan iborat delegatsiya amaliy tashrif bilan Xitoy Xalq Respublikasida bo‘ldi.

Tashrif doirasida Urumchi (Shinjon-Uyg‘ur avtonom rayoni) va Iu (Chjeszyan provinsiyasi) shaharlarida qator yirik kompaniyalar rahbarlari bilan samarali muzokaralar o‘tkazilib, ishlab chiqarish korxonalari faoliyati bilan tanishildi.

Xususan, zamonaviy turdagi ekologik toza qurilish materiallari va suyuq bo‘yoq ishlab chiqarishga ixtisoslashgan “Xinjiang Luyitongda Environmental Protection Technology Co. LTD” kompaniyasi rahbariyati bilan uchrashuvda viloyatimizda qiymati 35 mln. dollar bo‘lgan toblangan qurilish materiallari ishlab chiqarish loyihasini amalga oshirish yuzasidan yakuniy kelishuvga erishildi.

“Xinjiangdongshengyuanhe Shang Mao Youxiangongsi Co. LTD” kompaniyasining zamonaviy turdagi pol va devor uchun maxsus qoplamalar ishlab chiqarish faoliyati bilan tanishilib, kompaniya rahbari Dai Dong Hui bilan muzokaralar o‘tkazildi. Muzokaralar natijasida ikki tomonlar hamkorligida qiymati 15 mln. AQSH dollari bo‘lgan loyihani amalga oshirish bo‘yicha dastlabki kelishuvga erishildi.

“Chuang Jie Shi Co. LTD” kompaniyasining shampun va tozalovchi vositalar ishlab chiqarish va “Chuangfuture Agricultural Science and Technology Development Co. Ltd.” kompaniyasining qishloq xo‘jaligi o‘simliklari uchun mineral o‘g‘itlari ishlab chiqarishga oid faoliyatlari bilan tanishildi. Mazkur kompaniyalar bilan hamkorlik memorandumlari imzolanib, umumiy qiymati 10 mln. dollar bo‘lgan loyihalarni amalga oshirish bo‘yicha kelishib olindi.

“Xinjiang Sirel Packing Technology Co. LTD” kompaniyasiga tashrif davomida qog‘oz qutilari ishlab chiqarish faoliyati bilan tanishildi. Mazkur kompaniya bilan hamkorlikda qiymati 9 mln. dollar bo‘lgan qog‘oz qutilar ishlab chiqarish loyihasini amalga oshirish bo‘yicha kelishuv imzolandi.

“Xinjiang Raisins Co. LTD” kompaniyasiga tashrif buyurilib, meva-sabzavot mahsulotlarini qadoqlash va saqlash yo‘nalishidagi faoliyati bilan tanishildi. Kompaniya rahbariyati bilan uchrashuv o‘tkazilib, O‘zbekiston tumanidagi ayni yo‘nalishga ixtisoslashgan “Yaxyoxon Trade 2020” oilaviy korxonasi tomonidan quritilgan va qayta ishlangan mevalarni Xitoyga eksport qilish bo‘yicha qiymati 5 mln. AQSH dollari bo‘lgan eksport shartnomasi imzolandi.

Iu shahri Savdo sanoat palatasi rahbari bilan o‘tkazilgan uchrashuvda tomonlar o‘rtasida kelgusidagi hamkorlik aloqalarini rivojlantirish masalalari yuzasidan fikr almashildi. Muloqot chog‘ida Farg‘ona viloyati, xususan O‘zbekiston tumaniga investisiya kiritish istiqbollari muhokama qilindi. Muzokaralar yakunida tomonlar o‘rtasida “Do‘stlik” memorandumi imzolandi.

“Yiwu Yurong Import And Export Co. LTD” kompaniyasiga amalga oshirilgan tashrif davomida korxonaning oziq-ovqat mahsulotlarini saqlash va logistika markazi faoliyati bilan tanishildi. Mazkur kompaniya hamda O‘zbekiston tumanidagi “Yaxyoxon Trade 2020” oilaviy korxonasi o‘rtasida quritilgan, qayta ishlangan meva-sabzavotlarni qadoqlash va logistika markazini tashkil etish bo‘yicha qiymati 10 mln. dollarlik loyihani amalga oshirish yuzasidan kelishuvga erishildi.

“The World Of Fruits Co. LTD.” kompaniyasi faoliyati bilan tanishuv va uning rahbariyati bilan o‘tkazilgan uchrashuvdagi muzokaralar davomida ham O‘zbekiston tumanida yetishtirilgan, quritilgan va qayta ishlangan meva mahsulotlarini saqlash va Xitoy davlatiga eksport qilish bo‘yicha kelishuv imzolandi.